மெக்சிகோ டூ மதுரை: நம்ம ஊர் சர்க்கரை பூசணிக்காயின் வியப்பூட்டும் வரலாறு! 🎃

 தமிழ்நாட்டில் எந்த ஒரு  நற்காரியமாக இருந்தாலும், அமாவாசை போன்ற  நாட்களாக இருந்தாலும் சரி... 

அங்கே சுவையான கூட்டு, சாம்பார் செய்ய மஞ்சள் நிற சர்க்கரை பூசணிக்காய் நிச்சயம் இடம் பெற்றிருக்கும். (திருஷ்டி கழிக்க நாம் வெள்ளை பூசணியைப் பயன்படுத்துவது போல, சுப சமையலுக்கு இந்த மஞ்சள் பூசணி ரொம்பவே முக்கியம்). இன்று நம் வீட்டு சமையலறைகளிலும், சுபநிகழ்வுகளிலும் மரபு சார்ந்த காயாக வீற்றிருக்கும் இந்த பூசணிக்காய், உண்மையில் நம் மண்ணைச் சேர்ந்தது அல்ல என்றால் உங்களால் நம்ப முடிகிறதா? அது எப்படி கடல் கடந்து நம் ஊருக்கு வந்தது? அதன் சுவாரசியமான பின்னணியைத் தான் இந்தப் பதிவில் பார்க்கப் போகிறோம்..

பூசணியின் பெயர்க்காரணம்

பூசணிக்காயைக் குறிக்கும் 'Pumpkin' என்ற ஆங்கில வார்த்தை, "பெரிய தர்பூசணி" என்று பொருள்படும் 'Pepon' என்ற கிரேக்க வார்த்தையிலிருந்து உருவானது. இது பிரெஞ்சு மொழியில் 'Pompon' என்றும், பின்னர் ஆங்கிலத்தில் 'Pumpion' என்றும் மாறி, இறுதியில் 'Pumpkin' என உருவெடுத்தது.

ஆரம்பகால வரலாறு 

(மெக்சிகோ டூ அமெரிக்கா)

தொல்பொருள் சான்றுகளின்படி, பூசணிக்காய்கள் கிறிஸ்துவுக்கு முன் 7000 முதல் 5500 ஆண்டுகளுக்கு முன்பே மெக்சிகோ பகுதியில் பயிரிடப்பட்டன. மனிதர்களால் முதன்முதலில் பயிரிடப்பட்ட பழமையான பயிர்களில் இதுவும் ஒன்றாகும்.

அமெரிக்காவின் பூர்வகுடி மக்கள் (Native Americans) சோளம், அவரை மற்றும் பூசணி ஆகிய மூன்றையும் ஒன்றாகப் பயிரிடும் 'Three Sisters' என்ற பாரம்பரிய முறையைப் பயன்படுத்தினர். அவர்கள் இதன் சதைப்பகுதியை உணவாகவும், விதைகளை வறுத்தும் சாப்பிட்டனர்.

உலகளாவிய பரவல்கி.比. 15-ஆம் நூற்றாண்டில் கிறிஸ்டோபர் கொலம்பஸ் மற்றும் பிற ஐரோப்பிய ஆய்வாளர்கள் அமெரிக்காவைக் கண்டறிந்த பிறகு, அங்கிருந்து பூசணி விதைகளை ஐரோப்பாவிற்கு எடுத்துச் சென்றனர்.

இந்தியாவிற்கு வந்த கதை

 (ஏன் பறங்கிக்காய்?)

16-ஆம் நூற்றாண்டில் போர்த்துக்கேயர்கள் மூலமாகவே பூசணிக்காய் இந்தியாவிற்கு அறிமுகப்படுத்தப்பட்டது.ஐரோப்பியர்களை (வெளிநாட்டினரை) நம் முன்னோர் 'பறங்கியர்' என்று அழைத்தனர். அவர்களால் அறிமுகப்படுத்தப்பட்ட காய் என்பதால் இதற்கு 'பறங்கிக்காய்' அல்லது 'பறங்கிப்பூசணி' என்ற பெயர் உருவானது.

இன்றைய உலகளாவிய நிலை

இன்று இந்தியா, சீனா மற்றும் அமெரிக்கா ஆகியவை உலகளவில் பூசணிக்காயை அதிக அளவில் உற்பத்தி செய்யும் முதன்மை நாடுகளாகத் திகழ்கின்றன.

வியப்பான  விளைவு!

ஆகவே, இன்று தமிழர்கள் பெருமளவில்—குறிப்பாக தென்தமிழ்நாட்டு மக்கள்—நல்ல நாள், கிழமைகளிலும் சுபகாரியங்களிலும் பயன்படுத்துகின்ற 'சர்க்கரை பூசணி' என்ற மஞ்சள் பூசணிக்காய், எப்போதோ மெக்சிகோவில் பிறந்து, கடல் கடந்து வந்து, இன்று நம்முடைய மரபு சார்ந்த காய் போல் மாறிவிட்டது வியப்பிற்குரியதே!!

M.Porkodi Nangai 

Tamil writer & Author