கில்லட்டின் மெஷின்: ரஷ்யன் கதையும்.. பிரெஞ்சு புரட்சியின் உண்மை வரலாறும்! 🧐😮

நம்மில் பலருக்கு பள்ளிப் பாடப்புத்தகங்களில் படித்த ஒரு கதை நினைவிருக்கலாம். ஒரு கொடூரமான அதிபர் அல்லது அரசன், தன் நாட்டில் 60 வயதைக் கடந்த முதியவர்கள் எல்லாரையும் 'கில்லட்டின் மெஷின்' (Guillotine Machine) கொண்டு தலையை வெட்டிக் கொல்ல உத்தரவிடுவான். இறுதியாக ஒரு வயதான தாயின் புத்திசாலித்தனத்தால் அந்த சட்டம் ரத்து செய்யப்படும்.

நம்மில் பலர் இது ரஷ்யாவில் நடந்த  வரலாற்று நிகழ்வு என்று நினைத்துக் கொண்டிருக்கிறோம். ஆனால், உண்மை அதுவல்ல! இந்தக் கட்டுரையில், அந்த அருமையான கதையின் பின்னணியையும், உலகையே நடுங்க வைத்த 'கில்லட்டின்' இயந்திரத்தின் நிஜமான பிரெஞ்சு வரலாற்றையும் விரிவாகப் பார்ப்போம்.

 முதியவர்களின் தலையை வெட்டும் கதை: உண்மைமா? கற்பனையா? 👴👵

முதலில் நாம் சிறு வயதில் பாடப்புத்தகத்தில் படித்த அந்த அதிபர் கதையைத் தெரிந்து கொள்வோம். 

அது ரஷ்யாவில் நடந்த உண்மை நிகழ்வல்ல. அது உலகப் புகழ்பெற்ற 

"தி ஏஜ்டு மதர்" (The Aged Mother) என்ற ஒரு ஜப்பானிய நாட்டுப்புறக் கதையாகும் (Japanese Folktale).

முதியவர்களின் அனுபவ அறிவை இளைஞர்கள் மதிக்க வேண்டும், வயதானவர்கள் நாட்டுக்கு பாரமல்ல; சொத்து என்பதை உணர்த்துவதற்காக உருவாக்கப்பட்ட ஒரு உன்னதமான நீதிக்கதை இது. 

இந்தக் கதையில் வரும் கொடூரமான அரசனையும், தலையை வெட்டும் தண்டனையையும் படித்துவிட்டு, பலர் இதை ரஷ்யாவின் பழைய வரலாறு எனத் தவறாகப் புரிந்து கொண்டனர்.

உண்மை என்னவெனில்: ரஷ்ய வரலாற்றில் இப்படி ஒரு சட்டம் இருந்ததே இல்லை. அதுமட்டுமில்லாமல், ரஷ்யாவின் பழைய குற்றவியல் சட்டங்களின்படி 60 வயதுக்கு மேற்பட்ட முதியவர்களுக்கோ அல்லது பெண்களுக்கோ மரண தண்டனை விதிக்கக் கூடாது என்றே விதி இருந்தது!

கில்லட்டின் எனும் மெஷின்: உருவாக்கப்பட்டது எங்கே?

அப்படி என்றால் இந்த கில்லட்டின் என்ற பெயர் எப்படி வந்தது? 

இதை எதற்காக உருவாக்கினர்? 

எங்கு தான் பயன்படுத்தப்பட்டது?

இவற்றையெல்லாம் தெரிந்து கொள்ள முற்படும் போது தான்; இதற்குப் பின்னால் இருப்பது பிரான்ஸ் நாட்டின் ரத்தமும் புரட்சியும் நிறைந்த  கண்ணீரின் வரலாறு ஆகும்.

கி.பி. 1789-ல் உலகப் புகழ்பெற்ற பிரெஞ்சு புரட்சி (French Revolution) வெடித்தது.

 அதற்கு முன்பு வரை பிரான்சில் குற்றவாளிகளுக்கு கோடாரியால் வெட்டியோ அல்லது தூக்கிலிட்டோ கொடூரமான முறையில் மரணதண்டனை நிறைவேற்றப்பட்டது. 

ஏழைகளுக்கு சித்ரவதையான தண்டனையும், பணக்கார பிரபுக்களுக்கு வலியற்ற உடனடி மரணமும் வழங்கப்பட்டு வந்தது.

சட்டத்தின் முன் ஏழை, பணக்காரர் அனைவரும் சமம் என்பதை நிலைநாட்டவும், குற்றவாளிகளுக்கு வதவதவென்று சித்ரவதை தராமல் ஒரே நொடியில் 'வலியற்ற மரணம்' தரவும் ஒரு இயந்திரம் தேவைப்பட்டது.

டாக்டர் கில்லட்டினும்   அவர் உருவாக்கிய இயந்திரத்தின் வேகமும்! ⚔️

டாக்டர் ஜோசப்-இக்னாஸ் கில்லட்டின் (Joseph-Ignace Guillotin)

என்ற மருத்துவர்தான்,

 "மனிதநேய அடிப்படையில் மரணதண்டனையை வலியற்றதாக மாற்ற ஒரு இயந்திரத்தைப் பயன்படுத்த வேண்டும்" 

என்று பிரெஞ்சு நாடாளுமன்றத்தில் முன்மொழிந்தார். அவரது பரிந்துரையின் பேரில் உருவாக்கப்பட்டதால், இந்த இயந்திரத்திற்கு 'கில்லட்டின்' என்ற பெயர் வந்தது.

இதன் வடிவமைப்பும் செயல்பாடும்:

இந்த கில்லட்டின் சுமார் 14 அடி உயரமுள்ள இரண்டு மரத்தூண்களைக் கொண்டது.

இதன் உச்சியில் சாய்வான கோணத்தில் கூர்மையாக்கப்பட்ட, கனமான இரும்பு பிளேடு கயிற்றால் கட்டப்பட்டிருக்கும்.

குற்றவாளியின் கழுத்து மரக்கட்டைக்கு நடுவே வைக்கப்பட்டு, கயிற்றை அவிழ்த்தவுடன், புவிஈர்ப்பு விசையினால் அந்தப் பெருங்கத்தி கண்ணிமைக்கும் நேரத்தில் (வினாடிக்கும் குறைவான நேரத்தில்) கீழே இறங்கி தலையைத் துண்டித்துவிடும்.

துண்டிக்கப்பட்ட தலை கீழே இருக்கும் ஒரு கூடையில் விழும்.

பிரான்ஸ் அரசரையே பலிவாங்கிய இயந்திரம்! 👑

பிரெஞ்சு புரட்சியின் போது ஏற்பட்ட பயங்கரவாத ஆட்சிக் காலத்தில் (Reign of Terror), இந்த இயந்திரம் மிக வெறித்தனமாகப் பயன்படுத்தப்பட்டது. பிரான்ஸ் நாட்டின் மன்னரான

 பதினாறாம் லூயி (King Louis XVI) மற்றும் அவரது அரசியான மேரி அன்டோனெட் (Marie Antoinette) ஆகியோரின் தலைகள் இந்த கில்லட்டின் மெஷின் மூலமாகத்தான் பொதுமக்களுக்கு முன்னிலையில் துண்டிக்கப்பட்டன. இவர்களைத் தவிர சுமார் 17,000-க்கும் மேற்பட்ட அரசியல் எதிரிகள் இந்த இயந்திரத்தால் கொல்லப்பட்டனர்.

ஆச்சரியமான விஷயம் என்னவென்றால், ஏதோ 18-ஆம் நூற்றாண்டோடு இந்த இயந்திரம் ஒழிந்துவிட்டது என்று நாம் நினைப்போம். ஆனால், பிரான்ஸ் நாட்டில் 1977-ஆம் ஆண்டு வரை அதிகாரப்பூர்வமாக இந்த கில்லட்டின் மெஷின் மூலமே மரணதண்டனைகள் நிறைவேற்றப்பட்டு வந்தன!

கில்லட்டின் மெஷின் இப்போது நடைமுறையில் உள்ளதா? அது எப்போது ஒழிக்கப்பட்டது? 🚫

உலகையே நடுங்க வைத்த இந்த கில்லட்டின் மெஷின் இப்போது உலகத்தில் எந்த ஒரு நாட்டிலும் நடைமுறையில் இல்லை. இது முழுமையாக ஒழிக்கப்பட்டுவிட்டது.

கடைசி மரணதண்டனை: பிரான்ஸ் நாட்டில் 1977 ஆம் ஆண்டு செப்டம்பர் 10 அன்று 'ஹமிதா ஜாந்தூபி' (Hamida Djandoubi) என்ற குற்றவாளிக்கு நிறைவேற்றப்பட்டதே கில்லட்டினின் கடைசி மரணதண்டனை ஆகும்.

எப்போது, யாரால் ஒழிக்கப்பட்டது?: 

இந்த இயந்திரம் எந்த ஒரு மன்னராலும் ஒழிக்கப்படவில்லை. பிரான்சில் மன்னராட்சி முடிவுக்கு வந்த பல ஆண்டுகளுக்குப் பிறகு, 1981 ஆம் ஆண்டு செப்டம்பர் மாதம் பிரான்சின் அப்போதைய அதிபரான பிரான்சுவா மித்திரோ (François Mitterrand) தலைமையிலான அரசு மரணதண்டனையை முற்றிலும் தடை செய்யும் சட்டத்தைக் கொண்டு வந்தது.

கதைகளில் வரும் கில்லட்டின் இயந்திரம் முதியவர்களின் உயிரைப் பறிக்கும் கொடூரத்தின் அடையாளமாக நமக்குத் தோன்றினாலும், நிஜ வரலாற்றில் அது "சட்டத்தின் முன் அனைவரும் சமம்" மற்றும் "மரணத்திலும் மனிதநேயம் (வலியற்ற மரணம்)" என்ற நோக்கத்திற்காகவே உருவாக்கப்பட்டது.

கதைகள் தரும் நீதியும், வரலாறு தரும் உண்மையும் வெவ்வேறாக இருந்தாலும், இரண்டுமே மனித குலத்திற்கு மிக முக்கியமான பாடங்களையே கற்பிக்கின்றன!

M.Porkodi Nangai 

 Tamil writer & Author