இந்தியாவிற்கே முதல் விடுதலைப் போராட்ட வீரன்: சிப்பாய் கலகத்திற்கும் பல ஆண்டுகளுக்கு முன்பே ஆங்கிலேயரை அலறவைத்த கான்சாஹிப் மருதநாயகம்!

 வெள்ளையர் ஆட்சியில் மதுரையின் ஆளுநரான ஒரே தமிழன்!

ஆங்கிலேயர்களால் மதுரை மற்றும் திருநெல்வேலி பகுதியின் ஆளுநராக (Governor) நியமிக்கப்பட்ட ஒரே தமிழன் மருதநாயகம் மட்டுமே!

தளபதியிலிருந்து சுதந்திரப் போராளியாக: கிழக்கிந்தியக் கம்பெனியை எதிர்த்த வீரம்!

மதுரை நகரோடு நிலைத்த பெயர்: தளவாய் அக்ரகாரமும் கான்சாமேட்டு தெருவும்!

போர்க்களத்தில் வெல்ல முடியாமல் சதியால் கைதான சோகம்!

தூக்கிலிட்ட பிறகும் அஞ்சிய ஆங்கிலேயர்: உடலைத் துண்டு துண்டாக வீசிய வன்மம்!

 

இந்திய நாட்டின் விடுதலை நாளில், தென்னகத்தில் ஆங்கிலேயர் ஆட்சியை முதன்முதலாக உலுக்கி எடுத்த மாவீரர் கான்சாஹிப் மருதநாயகம் பிள்ளையை நினைவுகூர்வது நமக்குக் பெருமையளிப்பதாகும். ராமநாதபுரம் மாவட்டம் பனையூரில் பிறந்த இவர், தன் வாழ்வின் தொடக்கத்தில் பிரெஞ்சுப் படைகளிலும், பின்னர் கிழக்கிந்தியக் கம்பெனிப் படையிலும் சுபேதாராகப் பணியாற்றினார். போர்க்களத்தில் இவரது ஒப்பற்ற வீரத்தையும், நுட்பமான போர்த்தந்திரங்களையும் கண்ட ஆங்கிலேயர்கள், இவருக்கு 'கான்சாஹிப்' என்ற உயரிய பட்டத்தை வழங்கி கௌரவித்தனர்.

ஆங்கிலேயர் ஆட்சிக் காலத்தில் கிழக்கிந்தியக் கம்பெனியின் உயர் பதவிகளிலும் ஆளுநர் (Governor) பொறுப்புகளிலும் வெள்ளையர்கள் மட்டுமே கோலோச்சிய நிலையில், தன் ஈடிணையற்ற ஆளுமைத் திறனாலும் போர்த்தந்திரத்தாலும் ஆங்கிலேயர்களால் மதுரை மற்றும் திருநெல்வேலி பகுதியின் ஆளுநராக (Governor) நியமிக்கப்பட்ட ஒரே தமிழன் மருதநாயகம் மட்டுமே!

இவர் மதுரையை நிர்வகிக்கும் பொறுப்பை ஏற்றதால், பிற்காலத்தில் மதுரை நகரின் வரலாற்றுச் சிறப்புமிக்க பகுதிகளான 'தளவாய் அக்ரகாரம்' மற்றும் 'தளவாய் தெரு' ஆகியவை இவரது தளவாய் (ராணுவத் தளபதி) என்ற அதிகாரப்பூர்வப் பதவியைக் குறிக்கும் பெயர்களாகவே உருவாயின. அதேபோல, கான்சாஹிப் என்ற அவரது பெயரின் மருவலாகவே இன்றைக்கும் மதுரையில் 'கான்சாமேட்டு தெரு' என்ற பகுதி அழைக்கப்பட்டு வருகிறது.

தொடக்கத்தில் ஆங்கிலேயர்களின் நம்பிக்கைக்குரிய தளபதியாக இருந்து பாளையக்காரர்களின் எதிர்ப்பை அடக்க உதவிய மருதநாயகம், மதுரையை ஆளத் தொடங்கிய பிறகே ஆங்கிலேயர்களின் உண்மையான சுரண்டல் முகத்தைக் கண்டார். கிழக்கிந்தியக் கம்பெனியின் அடக்குமுறையையும், பாளையக்காரர்களிடம் அவர்கள் காட்டிய கொடூரத்தையும் நேரில் கண்ட அவரது மனதில் விடுதலை உணர்வு வீறுகொண்டெழுந்தது.

ஆங்கிலேயர்களுக்கு வரி செலுத்த மறுத்து, மதுரைக் கோட்டையில் சுதந்திரக் கொடியை ஏற்றி அவர்களுக்கு எதிராகப் பகிரங்கப் போர்க்கொடி உயர்த்தினார். வடஇந்தியாவில் வெடித்த சிப்பாய் கலகத்திற்குப் (1857) பல தசாப்தங்களுக்கு முன்பே, அதாவது 1762-லேயே ஆங்கிலேயரின் அதிகாரத்தை எதிர்த்துப் போரிட்டதன் மூலம் முழு இந்தியாவிற்கே முதல் சுதந்திரப் போராட்ட முன்னோடியாக மாறினார்.

மருதநாயகத்தின் கிளர்ச்சியைக் கண்டு அஞ்சிய ஆங்கிலேயர்கள், மதுரைக் கோட்டையை மாதக்கணக்கில் முற்றுகையிட்டனர். போர்க்களத்தில் இவரை நேருக்கு நேர் சந்திக்கத் துணிவில்லாத ஆங்கிலேயர்கள், நயவஞ்சகப் பாதையைத் தேர்ந்தெடுத்தனர். மருதநாயகத்தின் படையில் இருந்த சில துரோகிகளின் உதவியோடு, அவர் தொழுதுகொண்டிருந்த நேரத்தில் தந்திரமாகக் கைதானார்.

1764-ஆம் ஆண்டு அக்டோபர் 15-ஆம் தேதி, மதுரைக் காளவாசல் பகுதியில் ஆங்கிலேயர்களால் மருதநாயகம் தூக்கிலிடப்பட்டார். தூக்கிலிடப்பட்ட பின்னரும் அவரது வீரத்தைக் கண்டு ஆங்கிலேயர்கள் அடைந்த பயம் தீரவில்லை. அவரது உடலைக் கண்டு மக்கள் விழிப்படைந்து மீண்டும் ஒரு புரட்சி வெடித்துவிடக் கூடாது என்பதற்காக, அவரது உடலைத் துண்டு துண்டாக வெட்டி தமிழ்நாட்டின் வெவ்வேறு ஊர்களுக்கு எடுத்துச் சென்று வீசி எறிந்தனர்.

அவரது தலையைத் திருச்சிக்கும், உடலின் பிற பகுதிகளை மதுரை, திருநெல்வேலி, பாளையங்கோட்டை போன்ற வெவ்வேறான பகுதிகளுக்கும் அனுப்பித் தங்களின் வன்மத்தைத் தீர்த்துக் கொண்டனர். அவரது தலையற்ற உடல் மதுரைக் காளவாசலில் அடக்கம் செய்யப்பட்டது; இன்றைக்கும் அங்கே அவரது தர்கா அமைந்திருப்பதை நாம் காணலாம்.

தான் வாழ்ந்த காலத்தில் ஆங்கிலேயரை நடுங்க வைத்து, மறைந்த பிறகும் தன் உடலால் அவர்களை அஞ்சச் செய்த மாவீரர் கான்சாஹிப் மருதநாயகத்தின் வரலாற்றையும், மதுரையோடு அவருக்குள்ள பிணைப்பையும் இந்த விடுதலைத்திருநாளில் போற்றி நினைவுகூர்வோம்.

M.Porkodi Nangai

 Tamil writer & Author 

.

.